"Komandamı məğlub saymıram".

Prosport.Az xəbər verir ki, bunu "Neftçi"nin məşqçisi Daviti Çivçivadze "Sabah"a qarşı Azərbaycan Basketbol Liqasının final seriyasının 6-cı matçından sonra deyib.

Gürcü mütəxəssis çempionluğu əldən verdikləri görüşü (78:83) şərh edib: "Mövsüm barədə onu deyə bilərəm ki, mən gələndə komanda aşağı pillədə idi. Heç kim inanmırdı ki, komanda pley-off mərhələsində və finalda iştirak edə bilər. Ancaq gərgin əməyimiz sayəsində buna nail olduq. Onu da deyim ki, finalda ölkənin ən güclü kollektivi ilə qarşılaşdıq. Böyük əzmlə mübarizə apardıq və güclü rəqibə məğlub olduq. Buna baxmayaraq, oyunçularımla fəxr edirəm. Onların hər birini döyüşçü adlandırardım. Ancaq idmanda şans da vacibdir. Bu, oyundur, qalib olduğu kimi, məğlub tərəf də var. Ancaq mən "Neftçi"ni məğlub saymıram. Çünki biz ən aşağı pillədən başladıq və çempionatı 2-ci pillədə bitirdik".

Qeyd edək ki, tərəflər arasında 6 oyun keçirilib. Final seriyasının son matçında 4-cü qələbəni əldə edən "bayquşlar" ardıcıl 3-cü dəfə qızıl medallara sahib çıxıb.