"İlk növbədə komandaya qələbədə böyük əmək sərf etdiyinə görə təşəkkür edirəm. Ədalətli olaraq, dominant oyun nümayiş etdirdik və məntiqi qələbə qazandıq".

Prosport.Az xəbər verir ki, bu sözləri Azərbaycan Basketbol Liqası final seriyasının 5-ci oyununda “Neftçi”yə 107:89 hesabı ilə qalib gələn "Sabah"ın baş məşqçisi Rimas Kurtinaytis deyib.

Litvalı mütəxəssis intensiv oyun nümayiş etdirdiklərini bildirib: "1 günlük istirahət basketbolçulara faydalı oldu. Onların psixoloji vəziyyətinə yaxşı təsir etdi. Lakin hələ heç nə bitməyib. Qələbə qazansaq da, əvvəlki 2 oyunda məğlubiyyət bizim üçün bir dərsdir. Oyuna fərqli "5-lik"lə başladıq. Düşünürəm ki, bu da oyunumuza öz müsbət təsirini göstərdi".