Azərbaycan Basketbol Liqasında 2025/26 mövsümü üçün A və B qruplarının tərkibi müəyyənləşib.

Prosport.Az-ın xəbərinə görə, tərkibin müəyyənləşməsinə klubların cari mövsümkü çıxışı təsir edib.

Belə ki, B qrupunda 1-ci və 2-ci yeri tutmuş "Şəki" və "Gəncə" növbəti mövsümdən güclülərin yer aldığı A qrupunda mübarizə aparacaq. A qrupundan isə "Naxçıvan" və "Sərhədçi" oktyabrda başlayacaq çempionatda B qrupunda yarışacaq.

A qrupunda NTD sonuncu yeri tutsa da, Azərbaycan Kubokunun qalibi olduğundan, bu komanda həmin qrupun 2-cisi olan "Naxçıvan"la əvəzlənib. "Naxçıvan"ın B qrupuna salınmasında çempionatda yarımfinala vəsiqə qazana bilməməsi rol oynayıb.

Beləliklə, növbəti mövsüm A qrupunda "Sabah", "Neftçi", "Şəki", "Abşeron", "Gəncə" və NTD, B qrupunda isə "Ordu", "Naxçıvan", "Sərhədçi", "Sumqayıt", "Quba" və "Lənkəran" komandaları mübarizə aparacaq.

Qeyd edək ki, cari mövsümün qalibi "Sabah" və "Neftçi" arasında keçirilən görüşlərdən sonra bilinəcək. Hazırda komandalar arasında ümumi hesab 2:2-dir. 3-cü yeri isə "Şəki" tutub.