Ölkəmizdə ilk dəfə təşkil olunacaq 3x3 basketbol üzrə Dünya Kubokunun seçmə mərhələ oyunlarının püşkü atılıb.

Prosport.Az xəbər verir ki, paytaxt Bakıda həm kişi, həm də qadın millilərimiz əsas mərhələyə vəsiqə qazanmaq uğrunda mübarizə aparacaq.

Kişi millimiz B qrupunda Kanada və Böyük Britaniya yığmaları, qadın millimiz isə B qrupunda Latviya və Misir komandaları ilə qarşılaşacaq. Kişilərin yarışında A qrupunda Monteneqro, Ruanda və İran, qadınlarda isə A qrupunda Çili, Tayvan və Braziliya milliləri qruplardan çıxmağa çalışacaq.

Kişi millimiz qrupda ilk oyununu mayın 24-də saat 19:05-də Kanadaya qarşı, qadın millimiz isə saat 18:15-də Misirə qarşı keçirəcək.

"Sea Breeze" istirahət mərkəzində baş tutacaq seçmə mərhələsində qruplarda ilk 2 yerdə qərarlaşacaq komandalar yarımfinala vəsiqə qazanacaq. Turniri ilk 3 pillədə başa vuracaq yığmalar Dünya Kubokunun əsas mərhələsində iştirak etmək hüququ əldə edəcək.

Qeyd edək ki, Dünya Kubokunun oyunları iyunun 23-29-da Monqolustanın paytaxtı Ulan-Bator şəhərində baş tutacaq.