"Sabah" Azərbaycan Basketbol Liqasının final seriyasının ilk oyununda "Neftçi"yə 94:89 hesabı ilə qalib gəlib.

Prosport.Az xəbər verir ki, hər iki komandanın məşqçisi matçdan sonra fikirlərini bölüşüb.

Rimas Kurtinaytis ("Sabah"): "Oyunun əvvəlində "Şəki" səfərinin yorğunluğu hiss olunurdu. Bundan əlavə, rəqibin də məşqçi və oyunçu heyəti görüşə çox yaxşı hazırlaşmışdı. Üstəlik, rəqibin heyətində ucaboy oyunçuların çoxluğu bizə müəyyən problemlər yaratdı. Bu səbəbdən uzun oyunçumuz Klavs Çavars 35 dəqiqəyə yaxın parketdə oldu. Buna baxmayaraq, onun fiziki göstəriciləri bu müddət ərzində əla səviyyədə oyun sərgiləməyə kifayət etdi. Sonda xarakter nümayiş etdirsək də, final seriyasının növbəti oyunlarında daha da yaxşı oyun sərgiləməliyik".

Daviti Çivçivadze ("Neftçi"): "Bu, çox çətin və super finallara layiq oyun idi. Oyunçularımla fəxr edirəm. Çox böyük iş gördülər. Son hissədə bəzi fitlər oldu ki, oyunun tempini dəyişdirdi. Biz müharibəni yox, döyüşü uduzduq. Qalibiyyət seriyası 4-ə kimidir. Biz geriyə çox güclü qayıdacağıq".