"Neftçi" Azərbaycan Basketbol Liqasının yarımfinal seriyasının ikinci matçında "Abşeron"a 81:72 hesabı ilə qalib gələrək, finalda "Sabah"ın rəqibi olub.

Prosport.Az xəbər verir ki, oyundan sonra hər iki komandanın məşqçisi görüşlə bağlı fikirlərini bölüşüb.

Daviti Çivçivadze ("Neftçi"): "Artıq finaldayıq. "Sabah"la oyuna hazırlaşıb ən yaxşı nəticəni göstərməyə çalışacağıq. "Öncə komandamı gözəl oyuna və layiqli qələbəyə görə təbrik edirəm. Deyim ki, bizim üçün çox çətin oyun idi. Rəqib komanda hər iki qarşılaşmada öz gücünü göstərdi. Bunun səbəbi isə o idi ki, onlar çox sayda oyun keçirmişdilər. Bizim isə müntəzəm mövsümdən sonra cəmi 4 oyunumuz olmuşdu. Görüşə yavaş və ağır tempdə başladıq. İkinci hissədə səhvlərimizi müzakirə etdik və müəyyən dəyişikliklərə əl atdıq. Fasilədən sonra bizim oyunumuz başladı və matçı idarə edən tərəf olduq. Hücumda və müdafiədə ribaundları idarə etdik. Basketbolçularım rəqibin zəif nöqtələrini və öz oyunlarını tapdılar. Belədə hücumu gücləndirdik. 24 assist etdik və bu çox yaxşı nəticə idi".

Erhan Toker ("Abşeron"): "İlk oyundakı məğlubiyyətdən sonra işimiz çətinləşmişdi. Buna qədər də biz mərhələləri 3 oyundan sonra adlaya bilmişdik. Bu da öz növbəsində ardıcıl istirahətsiz oyunlar deməkdir. İmkanımız olsaydı, bəzi basketbolçulara istirahət verərək oynadardım, amma elə bir şansımız yox idi. Rəqib isə bizdən daha gümrah idi. Onlar bizdən daha az oyun keçirmişdilər. Sadəcə müqayisə aparsaq, digər komandalarda mövsüm ərzində daha təcrübəli yerli oyunçular oynadı. Bizim gənclərimiz də gələcəyin dəyərli oyunçuları olacaq. Onlara və bütün komanda üzvlərimə çox böyük təşəkkür edirəm. Basketbolçularım məğlub olduğumuz heç bir oyunda mübarizəsiz təslim olmayıb. Elə "Neftçi" ilə matçlar da daxil olmaqla qazanmaq üçün hər şeyi etdik. Mövsüm ərzində fəlsəfəmiz də bu idi. Nəticədən asılı olmayaraq, əlimizdən gələnin ən yaxşısını etmək".

Qeyd edək ki, final seriyasına mayın 2-də start veriləcək.