Azərbaycan Kunq Fu Federasiyasının məşqçisi Anar Süleymanlının rəhbərliyi altında Məhəmməd Məmmədov (57 kq) və İbrahim Əsgərov (70 kq) Türkiyənin İstanbul şəhərində “Akın Fight” döyüş klubunun təşkil etdiyi beynəlxalq turnirdə uğur qazanıb.

Prosport.Az xəbər verir ki, Məhəmməd Məmmədov gənclər arasında türkiyəli idmançıs Taha Rəmzi ilə kəmər uğrunda döyüşərək, rəqibini xal üstünlüyü ilə məğlub edib və “Akın Fight” kəmərinin sahibi olub. Bu, Məhəmmədin artıq bu turnirdə 2-ci qalibiyyətidir. O, sentyabr ayında Qran-pridə vuruşacaq.

İbrahim Əsgərov isə yeniyetmələr arasında türkiyəli idmançı Yusif Kocabağa ilə qarşılaşmış və döyüşü xal hesabı ilə qalib başa vuraraq turnirin çempionu adını qazanıb.

Qeyd edək ki, turnirin əsas döyüşündə dəfələrlə dünya və Avropa çempionu olmuş, “Cobra” ləqəbli azərbaycanlı idmançı Pərviz Abdullayev Niderland təmsilçisi Guillermo Bloklandla qarşılaşmış və ilk raundda rəqibini bir neçə dəfə naokdauna (knockdown) salaraq döyüşü vaxtından əvvəl qələbə ilə başa vurub. Pərviz Abdullayev də bu qələbə ilə “Akın Fight” kəmərinin sahibi olmuşdur.