"Rəqibimizi finala çıxdığı üçün təbrik edirəm".

Prosport.Az xəbər verir ki, bunu klubun mətbuat xidmətinə müsahibəsində "Şəki" basketbol klubunun baş məşqçisi Bedri Meriç deyib.

O, Azərbaycan Basketbol Liqasının yarımfinalının Şəki Olimpiya İdman Kompleksində keçirilən cavab oyununda "Sabah"a 72:96 hesabı ilə uduzmalarının səbəbini açıqlayıb: "Mövsümün gətirdiyi yorğunluqdan dolayı enerjimiz azalmışdı. Yenə də uşaqlar əllərindən gələni etdi. İlk hissədə rəqibə qarşılıq verə bilmədik. Ondan sonra da matçda onlara çatmağımız mümkünsüz oldu".

Türkiyəli mütəxəssis mövsümü isə belə dəyərləndirib: "Mövsümün ən yaxşı performans göstərən komandası olduq. Finala çıxa bilməsək də, çempionatı 3-cü sırada bitirdik. Bu, bildiyim qədəri ilə Şəki şəhərinin idman tarixində ən yaxşı nəticədir. Şəki şəhərinə bu da bizdən hədiyyə olsun. Düşünürəm ki, Şəkinin idman mədəniyyətinin inkişafı üçün bu, bir addım oldu. Ümidvaram ki, bu uğurdan sonra Şəkidə basketbola maraq artar, məşqçilər daha yaxşı oyunçular yetişdirər, valideynlər uşaqlarını idmana yazdırar. Şəki kiçik şəhər olsa da, burada böyük ürəklərlə oynadıq. Bütün oyunçularımı ürəkdən təbrik edirəm. Mövsüm boyu bizim yanımızda olan azarkeşlərə də təşəkkürümü çatdırıram".