“Bugünkü mübarizəyə görə komandama təşəkkür, “Sabah”ı isə təbrik edirəm. Rəqibin avrokuboklar üçün qurulmuş heyəti var. Əslində oyuna yaxşı başlaya, planladığımız kimi müdafiə oluna bilmədik. Fiziki yorğunluqdan dolayı bir az zəif çıxış etdik. Amma 2-ci hissədə oyunu bir az bərabərləşdirməyə çalışdıq. Sadəcə, qələbə üçün gücümüz yetmədi".

Prosport.Az xəbər verir ki, bunu "Şəki" basketbol klubunun baş məşqçisi Bedri Meriç deyib.

Türkiyəli mütəxəssis "Sabah"la Azərbaycan Basketbol Liqasının yarımfinal mərhələsinin Bakıda keçirilmiş ilk oyununda qələbə üçün güclərinin yetmədiyini söyləyib: "A qrupunun MVP-si seçilmiş Hassani Qravet az xal topladı. Çünki ona qarşı necə oynamalı olduğumuzu bilirdik. Ancaq onu dayandırmağımıza baxmayaraq, digər oyunçu Ceyms İds 24 xal qazandı”.

O, cavab matçında azarkeşlərə sürpriz söz verib: “Azarkeşlərə Şəkidəki cavab matçında sürpriz edəcəyimizi söz verə bilərik. Gəlib bizi dəstəkləsinlər. Çünki bu mövsüm öz meydanımızda cəmi 1 məğlubiyyət almışıq. Vacib matçların hamısında qalib gəlmişik. Əminəm ki, yenə Şəkidə qələbə qazanacağıq”.

Qeyd edək ki, “Sabah” – “Şəki” matçı "bayquşlar"ın 86:73 hesablı qələbəsi ilə yekunlaşıb.