"İlk olaraq rəqibimizə yarımfinalda uğurlar diləyirəm. Bizim üçün bu il mövsüm erkən başa çatdı. Buna görə çox məyusuq. Təssüf ki, normal mövsümdə göstərdiyimiz performansı pley-off mərhələsində sərgiləyə bilmədik".

Prosport.Az xəbər verir ki, bunu “Naxçıvan” BK-nın baş məşqçisi Murat Dikmən “Abşeron” BK ilə oyundan sonra deyib.

Türkiyəli mütəxəssis "Abşeron"a gözlənilmədən 73:78 uduzmalarının səbəbini izah edib: "Komandanı Cermeyn Maroudan öncə və sonra şəklində dəyərləndirmək lazımdır. Onun komandadan ayrılması bütün oyun planlarımızın dəyişməsinə səbəb oldu. Təəssüf ki, onun yerinə eyni keyfiyyətdə başqa bir basketbolçu tapa bilmədik. Ancaq onun yoxluğunda da yaxşı yerlərə gəldiyimizi düşünürəm. Lakin bu cür pley-off oyunlarından onun kimi lider və xüsusi basketbolçuya ehtiyac vardı. Bu ilin bunun çətinliyini həm Kubokda, həm də çempionatda yaşadıq. 2 ildir ki, bu klubdayam və hər zaman əlimdən gələnin ən yaxşısını etməyə çalışmışam. Çox dəyərli oyunçular, məşqçilər və rəhbərlərimizlə işlədim. Hamımız birlikdə klubu yaxşı yerlərə gətirməyə çalışdıq. Amma bu mövsüm istədiyimiz kimi olmadı".