"Play-in"dən etibarən çox yaxşı mübarizə aparırıq. Burada işimiz çətin idi. İlk oyunu uduzmuşduq".

Prosport.Az xəbər verir ki, bunu "Abşeron"un baş məşqçisi Ərhan Tokər Azərbaycan Basketbol Liqasının pley-off mərhələsində "Naxçıvan"a qalib gələrək yarımfinala yüksəldikləri oyunu dəyərləndirərkən deyib.

Türkiyəli mütəxəssis 78:73 hesablı qələbədən məmnun olduqlarını bildirib: "Bu qələbə asan başa gəlmədi. Oyunçularımı təbrik edirəm. Konsentrasiyalarını itirmədilər. Sona qədər mübarizə apardılar. Bu tip oyunlar məhz yaxşı mübarizə aparıb sona qədər oynadıqda qalib gəlinir. Oyunçularım da belə etdi. Bir-birimizə yardım etdik. Hər hansı gərgin məqamda da pozitiv olmağa çalışdıq. Sonunda bacardıq. Oyunun gedişində Aubri Makalpaynı tez itirdik. Cəzalı duruma düşdü. Bunun əvəzində Lari Robinsonun çox böyük faydası oldu. Hazırda çox yorğunuq. Yarımfinalın ilk oyununa qədər vaxt azdır. Dincəlib, sonra dərhal növbəti oyuna hazırlaşacayıq. Sonda rəqibi də təbrik edirəm. Çox gözəl 3 oyun sərgilədilər.

O, yarımfinalda "Neftçi" ilə oyundakı şanslar barədə də danışıb: "Biz pley-ində Kubokun qalibini məğlub etdik. Daha sonra müntəzəm mövsümün 2-cisini sıradan çıxardıq. Onlarla matçlarda favorit deyildik. Yarımfinalda da favorit deyilik. "Neftçi" mövsümə pis başlamışdı, amma  çox yaxşı davam etdilər. Hazırda da yaxşı formadadırlar. Hər zaman dediyim kimi, bacardığımız qədər ən yaxşı oyunumuzu göstərməyə və mərhələni keçməyə çalışacağıq. Favorit olmadığımızdan psixoloji olaraq rahat olacağıq".

Qeyd edək ki, pley-off mərhələsinin 3-cü matçında "Abşeron" "Naxçıvan"a qalib gəlib. Bunadək tərəflər bu raundda hərəyə 1 qalibiyyət əldə etmişdi. Abşeron təmsilçisi növbəti mərhələdə "Neftçi" ilə üz-üzə gələcək.