Azərbaycan klubları Türkiyənin Antalya şəhərində keçirilən "Junior World Cup" adlı beynəlxalq turnirdə çıxış edir.
Prosport.Az-ın xəbərinə görə, Azərbaycandan orada "Qarabağ", "Sabah" və "Ulduz" futbol akademiyalarının komandaları çıxış edir.
"Qarabağ"ın 15 yaşadək (U-15) komandası B qrupunda ilk gündə "Fulhem"ə (İngiltərə) 1:3 uduzub, "Qaziəmir Gündoğan"a (Türkiyə) və "Muratlı Yıldızspor"a (Türkiyə) 8:0 qalib gəlib. Ümumi 6 qrup üzrə 6 xalla 10-cu olan Rauf Əliyevin baş məşqçisi olduğu kollektiv dünən 9-cu yeri tutmaq üçün sıralama matçlarında A qrupunda "Rayo Vayekano" (İspaniya) ilə 1:1 oynayıb, "Göztəpə"nin London Futbol Akademiyasının (Türkiyə) komandasını 6:1 darmadağın edib. "Qarabağ" bu gün Papua Futbol Akademiyasının (İndoneziya) komandası ilə qarşılaşacaq.
Şahin Zeynalovun çalışdırdığı "Sabah"ın U-15-i isə ilk gündə D qrupunda "Rayo Vayekano" ilə 1:1 oynayıb, "Konyaaltı"nı (Türkiyə) 2:1, "Manisa Şəhitlərspor"u (Türkiyə) 7:0 məğlub edib. 7 xalla 7-ci olan "Sabah" 1/4 finala vəsiqə qazanıb. Burada komandamız dünən "Fulhem"ə 0:2 uduzub. Daha sonra "bayquşlar" 5-8-ci yerlər uğrunda OİNA FK-ya (Qazaxıstan) 6:0 qalib gəlib. Komanda bu gün 5-ci yeri tutmaq üçün "Samsunspor"la (Türkiyə) qarşılaşacaq.
Nasir Nəsirlinin baş məşqçisi olduğu "Sabah"ın U-13 komandası isə ilk gündə C qrupunda "Mançester Siti"yə (İngiltərə) 3:5 uduzub, "Konyaspor"a (Türkiyə) 3:1 və "Hatay Altıngənçlik Bəyaz"a (Türkiyə) 11:0 qalib gəlib. 6 xalla 14-cü olan "Sabah" sıralama matçlarında 13-cü olmaq üçün B qrupunda "Kadriyəspor"u (Türkiyə) və "Energetik"i (Belarus) 3:0 məğlub edib. Komanda bu gün "Özərspor"la (Türkiyə) oynayacaq.
Gənclər və İdman Nazirliyi tərəfindən dəstəklənən "Ulduz" Futbol Akademiyasının U-14 komandası isə ilk gündə E qrupunda Moskva "Dinamo"suna (Rusiya) 0:7 uduzub, "Oba Bələdiyəspor"u (Türkiyə) 4:0 və "Konyaaltı"nı 3:1 məğlub edib. 6 xalla 10-cu olan Rüstəm Əliyevin komandası ümumilikdə turnirin 9-cusu olmaq üçün A qrupunda mübarizəyə qatılıb. Burada "Everton"a (İngiltərə) 1:4 uduzan "Ulduz" bu gün "İkizlərspor" (Türkiyə) və "Çisemspor"la (Türkiyə) oynayacaq.