"Neftçi" Azərbaycan Basketbol Liqasında pley-off mərhələsinin ilk oyununda "Ordu"ya 93:84 hesabı ilə qalib gəlib.

Prosport.Az xəbər verir ki, hər iki komandanın baş məşqçisi matçla bağlı fikirlərini bildirib.

Daviti Çivçivadze ("Neftçi"): "İlk oyunlar bizə göstərdi ki, pley-offda zəif komanda, zəif oyun yoxdur. Rəqibimiz yaxşı təşkilatlanmış komandadır və yaxşı məşqçi heyəti var. Bizim 2 fərqli yarımhissəmiz oldu. Öncə oyuna çox çətin başladıq və xal hesabında geri düşdük. Sonradan oyunumuzu bərpa etdik. Mən həmişə demişəm və bir daha təkrar edirəm. Biz komanda halında yaxşı müdafiə olunanda istədiyimiz nəticəni əldə edirik və bu, hücuma da yaxşı təsir edir. Bu, ilk oyun idi, ancaq 2-ci oyunumuz daha çətin olacaq. Qələbə bizim üçün çox vacib idi. Komandamı bu münasibətlə təbrik edirəm və təbii ki, növbəti oyuna hazırlaşacağıq".

Alberto Blanko ("Ordu"): "İlk olaraq “Neftçi” komandasını qələbə münasibətilə təbrik edirəm. Biz oyuna yaxşı başladıq və böyük fasiləyə kimi yaxşı oynadıq. Xüsusilə lazımi tempi qoruyaraq həm müdafiədə, həm də hücumda yaxşı işlər gördük. Biz oyunu 3-cü periodda uduzduq. Çünki müdafiəmizin çoxlu səhvləri hesabına rəqib 38 xal qazandı. Bununla belə, 10 xal geridə olmağımıza baxmayaraq, komanda ruhdan düşmədi və son saniyələrə qədər qələbə üçün mübarizə apardı. Komandanın göstərdiyi oyundan, əzmkarlığından razı qaldım. Buna görə də oyunçularımı belə performansa görə təbrik edirəm. Məğlubiyyətə görə üzülürük, çünki qələbəyə layiq idik”.