"Əvvəlcə rəqib komandanın həm məşqçiləri, həm də oyunçularını göstərdikləri mübarizəyə görə təbrik edirəm".

Prosport.Az xəbər verir ki, bu sözləri "Şəki"nin baş məşqçisi Bedri Meriç Azərbaycan Basketbol Liqasının pley-off mərhələsinin "Gəncə" ilə ilk oyunundan sonra deyib.

Türkiyəli müətəxəssis overtaymda qazanılan 85:84 hesablı qələbəni şərh edib: "Mübarizənin dozası çox olan bir matç alındı. Bizim "Gəncə" ilə matçlarımız həmişə belə keçir, izləyici və tamaşaçılar üçün çox zövqlü oyunlar olur. Açığı, biz texniki baxımdan çox yaxşı çıxış etmədik. Xüsusən müdafiədə uzun oyunçularımız zəif oynadı. Bir uzun oyunçumuz zədələnib çıxdı, digəri texniki faul aldı. Bununla belə, basketbolun texniki tərəfi ilə yox, sadəcə, mübarizə aparıb qalib gəldik. Ehtiyatdan girən Pol Dibal, Tomi Lyuk, Adebayo Oduleye bu oyunda bizə çox xeyir verdi. Bu bir komanda olmağımızın göstəricisidir. Ona görə də bütün oyunçularımla qürur duyuram".

O, 2-ci qarşılaşma barədə də danışıb: "Bu, pley-offun 1-ci matçı idi. Heç nə bitmiş deyil. Rəqib meydançada daha bir matçımız var. Həmin oyunda da qalib gəlmək üçün əlimizdən gələni edəcəyik. Bu mövsüm ilk dəfə Gəncəyə oyundan 1 gün əvvəl gedəcəyik."

"Gəncə"nin baş məşqçisi Halil Atlı isə oyunla bağlı qısaca olaraq bunları söyləyib: "Rəqibimizi təbrik edirəm. Növbəti oyunu gözləyirik. Həmin matça uyğun hazırlaşacağıq".

Qeyd edək ki, tərəflər arasında cavab qarşılaşması aprelin 20-də Gəncə İdman Sarayında keçiriləcək.