"Abşeron" Azərbaycan Basketbol Liqasının pley-in mərhələsinin 3-cü oyununda NTD-yə 81:74 hesabı ilə qalib gəlib.
Prosport.Az xəbər verir ki, matçdan sonra hər iki komandanın baş məşqçisi nəticəni şərh edib.
Ərhan Tokər ("Abşeron"): "Komandam oyuna yaxşı köklənmişdi. Gözəl oyun nümayiş etdirdik. Həm müdafiə, həm də hücumda yaxşı təsir bağışladıq. Gedişatda bəzi çatışmazlıqlar oldu, amma dediyim kimi, konsentrasiyanı itirmədik. 3-cü periodun əvvəlində 10 xallıq fərq yaratmışdıq. Daha sonra rəqib bizə çatmağa çalışdı və fərqi azaltdı. Sonradan toparlanıb yenidən fərq yaratdıq və o nöqtədə oyun qırıldı. Komandanı təbrik edirəm. Rəqibimizə də gözəl oyunlara görə təşəkkür edirəm. Bizim üçün 1/4 finala yüksəlmək gözəl nəticə oldu. Orada da əlimizdən gələnin ən yaxşısını etməyə çalışacağıq. Keçirdiyimiz hər artıq oyun bizi yüksək yerlərə daşıdığı qədər, oyunçularımızın oyun praktikasına da çox yaxşı təsir edir. Xüsusilə yerli gənc oyunçularımızın. Bir daha komandamı təbrik edirəm. Bu oyundan sonra çox qısa istirahət olacaq və yola davam edəcəyik".
Tahir Baxşıyev (NTD): "Belə bir oyundan sonra danışmaq çətindir. Fikirləşirdik ki, hər şey başqa cür olacaq. Amma necə oldu, elə də oldu. Bu idmandır. Ola bilsin ki, biz sadəcə emosional baxımdan tükəndik. Hər kəs uğur qazanmaq istəyirdi. Xüsusilə ölkə kubokundakı qələbədən sonra. İstək çox böyük idi. Bu komandanın potensialı daha yüksəkdir. Amma istədiyimizi göstərə bilmədik. "Abşeron"u təbrik edirəm və onlara daha da irəliləməyi arzulayıram. Yenə də, bu idmandır. Burada həm qələbələr, həm də məğlubiyyətlər olur. Biz ölkə kubokunu qazandıq. Amma çempionatda mövsüm uğursuz alındı. Mövsümə gənc oyunçularla başladıq. Sonra komandaya daha təcrübəli oyunçular qoşuldu. Onlar ölkə kubokundakı qələbəmizə əhəmiyyətli töhfə verdilər. “Abşeron”a qarşı oyunlarda isə aparıcı oyunçuların yorğunluğu və zədələr sözünü dedi. Amma biz bəhanə axtarmırıq.
Kubokun sahibi olaraq NTD avrokuboklarda iştirak edəcəkmi? Bu barədə hələ düşünməmişik. Bizim üçün mövsüm başa çatıb. Onu analiz etmək lazımdır. Sonra gələcək planlar barədə düşünəcəyik".