"Sərhədçi" Azərbaycan Basketbol Liqasında pley-in mərhələsinin 3-cü oyununda "Sərhədçi"yə 96:94 hesabı ilə qalib gəlib.

Prosport.Az xəbər verir ki, hər iki komandanın baş məşqkisi matçla bağlı fikirlərini bölüşüb.

Evren Alkaya ("Sərhədçi"): "Çox çətin matç oldu. Bu cür pley-in oyunlarında favorit olmur. Kim daha çox istəyirsə, kim daha yaxşı hazırlaşırsa, yaxşı müdafiə olunursa, oyunçuların səviyyəsinə baxmadan o qazanır. “Sumqayıt”ı təbrik edirəm, layiqli mübarizə apara bildilər. Müntəzəm mövsümün ikinci dönəmində necə çətin komanda olduqlarını göstərmişdilər. Birinci oyunda yaxşı hesabla qalib gəlmişdik və bunun nəticəsi olaraq öz meydanımızdakı qarşılaşmaya rahat çıxdıq. Üçüncü - həlledici oyunun əhəmiyyətini bilirdik və oyunçularım tam hazır idi. Hər iki oyunu səfərdə udmağımız bizim motivasiyamızı göstərir. Yaxşı müdafiə olunmağa çalışdıq. Buna baxmayaraq, rəqib yenə 90 xalı keçdi. Amma biz yalnız bu cür oyunla qazana bilərdik. Komandamız layiqli qələbə qazandı. Oyunçularım qalibiyyəti haqq etdi. Hər kəs bilir ki, bu cür oyunlarda son 2-3 dəqiqədə oynayan komanda qalibiyyət əldə edir. Bundan sonra da komandamızı yuxarı yerlərə daşımağa çalışacağıq. Hər kəs bilsin ki, “Sərhədçi” yaxşı təşkilatlanmış komandadır. Bir-birimizə bağlı olan kollektivik. Bunu da göstərməyə çalışacağıq. “Sumqayıt”a da növbəti mövsümdə uğurlar arzu edirəm”.

Vadim Kuramşın ("Sumqayıt"): "Təəssüf ki, pley-off mərhələsinə yüksələ bilmədik. Çox üzücü məğlubiyyət oldu. Oyunun sonlarında yersiz top itkilərinə yol verdik. Amma ən böyük səhvləri hakimlər etdi.  Belə vacib oyunda son saniyələrdə folu görmədilər. Oyun overtayma getməli idi. Orada hər şeyə aydınlıq gələcəkdi. İstənilən halda, komandama əla mübarizəyə görə təşəkkür edirəm. Digər komandalarla müqayisədə limit probleminə görə xeyli çətinliklərlə üzləşdik. Mövsümü bizimlə bir yerdə bitirən 4 legionerimiz sona qədər qəhrəmancasına mübarizə apardı. Hər oyun istirahətsiz və zədələrlə 40 dəqiqə oynadılar. Yaxşı statistika ilə də yadda qaldılar. Komandam bu mövsüm parlaq və baxımlı basketbol oynayan kollektiv kimi yadda qalacaq. Çox yaxşı mübarizə apardıq. Mənə mövsümün gedişində etimad göstərdiyinə görə rəhbərliyə təşəkkür edirəm. Əlimdən gələni etdim ki, komandam gözəl basketbol oynasın. Məncə, bunu bacardıq!"