Azərbaycan Basketbol Liqasının 1/8 final (pley-in) mərhələsinin cavab oyununda NTD "Abşeron"a 67:63 qalib gəlməklə, ümumi hesabı bərabərləşdirib.

Prosport.Az hər iki komandanın baş məşqçisinin fikirlərini təqdim edir:

Ərhan Tokər ("Abşeron"): "İlk oyunda olduğu kimi, yaxşı müdafiə olunaraq oyuna start verə bilmədik. Bununla yanaşı, hucum ribaundlarında da rəqibə uduzurduq. Rəqibimiz də o amildən yaxşı istifadə etdi. Özlərində güvən yarandı. Sonradan oyunu bərabərləşdirib önə keçsək də, matçı nəzarətdə saxlaya bilmədik. Bəzi oyunçuların üzərinə yük çox düşdü. Onları əvəz edə bilmədik. Ümumi olaraq deyə bilərəm ki, bəzi dəqiqələrdə yaxşı, digər qisimdə isə pis oynadıq. Bundan əlavə, çoxlu sayda sadə atış qaçırdıq. Psixoloji təzyiq bizim üzərimizdə olmamasına rəğmən, matçın kritik anlarında səbət altında şanslardan yararlana bilmədik. Rəqibi qələbə münasibəti ilə təbrik edirəm".

Tahir Baxşıyev (NTD): "Biz ilk oyunda açıq-aşkar zəif oynadıq. Toparlanmaq çətin idi. Cavab oyununa qədər cəmi 1 məşqimiz olmuşdu. İlk oyunu təhlil etdik. 2-ci oyunda nə edəcəyimizi məşq etdik. Bu matçda daha yaxşı oynadıq. Bərabər səviyyəli oyun oldu. Heç bir komanda oyunun gedişində hesabda böyük fərq yarada bilmədi. Bu qələbə psixoloji baxımdan bizə kömək edəcək. Amma qarşıda ən vacib – 3-cü oyun var. Bu oyun pley-offa kimin çıxacağını müəyyən edəcək. Mən deməzdim ki, Kubok oyunlarından sonra yorğunluq bizə mane olur. Problem zədələrdədir. Hər iki oyunu Tayri Boykin buraxdı. Detrek Brauninqə 40 dəqiqəni oynamaq lazım gəldi. Əkbər Məmmədov da zədə ilə oynayır. Amma mən komandama inanıram. Onlar nə etməli olduqlarını və nəyin uğrunda mübarizə apardıqlarını bilir. Biz sona qədər mübarizə aparacağıq".