"Sumqayıt" Azərbaycan Basketbol Liqasının 1/8 final (pley-in) mərhələsinin Bakıda keçirilən cavab oyununda "Sərhədçi"yə 100:97 qalib gəlib.

Prosport.Az hər iki komandanın baş məşqçisinin fikirlərini təqdim edir:

Vadim Kuramşın ("Sumqayıt"): "Komandamızın bütün üzvlərinə təşəkkür edirəm. Bu gün maksimum dərəcədə mükəmməl oynadıq. Sumqayıtda keçirilən ilk oyunu yaxşı təhlil etmişdik. Son bir neçə ayda sərgilədiyimiz oyunu bu gün təkrar etdik. Komanda oyunu və doğru taktika öz bəhrəsini verdi.  Bu gün "Sumqayıt" layiqli qələbə qazandı. Həlledici matçda işimiz çətin olacaq. "Sərhədçi"nin 8 legioneri var, bizim 4. 40 dəqiqə əvəzetməsiz oynamaq çətindir,  yorğunluq öz sözünü deyir. Amma yenə də qələbə qazanmaq üçün əlimizdən gələni edəcəyik. "Sumqayıt" bu mövsüm oynadığı bütün rəqibləri ən azı 1 dəfə məğlub edib. Çalışacağıq ki "Sərhədçi"dən 2-ci dəfə üstün olaq".

Evrən Alkaya ("Sərhədçi"): "Əvvəl dediyim kimi, “Sumqayıt” maraqlı komandadır. 3 amerikalı basketbolçusunun 3-ü də “3-lük”lərdə çox yaxşıdır. Topu atmağı bacarırlar və bunu sistemsiz də atırlar. İstədiyiniz formada müdafiə olunarkən belə, “3-lük”də dəqiq oynayırlar. Ötən oyun da 3 xal çox atdılar. Yenə eyni faizdə “3-lük” atdılar. Biz də çox müdafiə səhvləri etdik. Ribaundları onlara verdik. Ötən oyundakı rahat qalibiyyət bu məğlubiyyətin səbəbi oldu. Pis oynamadıq və 97 xal atdıq. Bu, ciddi rəqəmdir. Amma müdafiədə daha diqqətli olmalıyıq. Çox az “3-lük” atdıq. Etdiyimiz səhvlər bizə baha başa gəldi. Oyunçularla matçdan sonra bunu danışdıq. Amma rəqib fərqli komandadır. Heç bir sistem yoxdur, sadəcə xal atırlar. Boşluqlar tapıb “3-lük”lər atırlar. Əlimizdən gələni edib pley-offa qalmaq istəyirik. Səhvlərimizi anlayıb onları aradan qaldıracağıq”.

Qeyd edək ki, tərəflər arasında həlledici – 3-cü matç aprelin 16-da Sumqayıt Olimpiya İdman Kompleksində keçiriləcək.