"Əlimizdən gələni etdik. Amma sloven hakim (Natse Moxoriç) kobud səhvə yol verdi".

Prosport.Az xəbər verir ki, bunu "Quba"nın baş məşqçisi Şəhriyar Əsgərov bu gün kişilər arasında Azərbaycan Basketbol Liqasında "Ordu" ilə keçirdikləri oyunu şərh edəərkən deyib.

Mütəxəssis məğlubiyyətə görə çempionata dəvət olunmuş 2 əcnəbi hakimdən 1-ni qınayıb: "3 xal fərqi ilə geridə olduğumuz vaxtda 3 xallıq atış etdik, hakim də hücum foulu qeydə aldı. Bu da oyunun taleyini həll etdi. Digər tərəfdən, ağzımızı aça da bilmirik, hamıya texniki foul verirdi. Amma rəqib komandanın oyunçularına, məşqçisinə bu cür yanaşma yox idi. İstədiklərini edirlər. Bu oyunda hakimlərin bərbad idarəçiliyi bu vəziyyətə gətirib çıxardı. Rotasiyamız geniş deyil, güclə gəlib çatırıq, özümüzü "öldürürük", sonda da belə olur. Biz əlimizdən gələni etdik".

Qeyd edək ki, “Quba” bu gün keçirilən qarşılaşmada “Ordu”ya 88:92 hesabı ilə məğlub olaraq mübarizəni dayandırıb.