Azərbaycanın yunan-Roma güləşçiləri Slovakiyanın paytaxtı Bratislavada keçirilən Avropa çempionatında 2 medal qazanıblar.

Prosport.Az xəbər verir ki, Eldəniz Əzizli (55 kq) finalda rusiyalı Emin Seferşayevə (UWW) uduzaraq, 2-ci yeri tutub.

İslam Abbasov (87 kq) bürünc medal uğrunda qarşılaşmada Yaroslav Filçakova (Ukrayna) qalib gələrək, Avropa 3-cüsü olub.

Murad Məmmədov (63 kq) və Beka Kandelaki (130 kq) isə üçüncü yer uğrunda görüşdə uduzublar.

Xatırladaq ki, daha əvvəl sərbəst güləşçilər 1 qızıl, 1 gümüş və 4 bürünc mükafata sahib çıxıblar. Giorgi Meşvildişvili (125 kq) Avropa çempionu olub, Osman Nurməhəmmədov (92 kq) gümüş, İslam Bazarqanov (57 kq), Əli Rəhimzadə (65 kq), Kənan Heybətov (70 kq) və Ağanəzər Novruzov (74 kq) bürünc medala sahib çıxıblar.

Azərbaycanın sərbəst güləş millisi komanda hesabında Avropa çempionu olub.

Qadınlardan isə Jalə Əliyeva (57 kq) bürünc mükafat əldə edib.

Qitə birinciliyi aprelin 13-də başa çatacaq.