"Ordu" Azərbaycan Basketbol Liqasında (ABL) pley-in mərhələsinin ilk oyununda “Quba”ya 91:83 hesabı ilə qalib gəlib.

Prosport.Az xəbər verir ki, matçdan sonra hər iki komandanın baş məşqçisi nəticəni şərh edib:

Alberto Blanko ("Ordu"): "Bu bir pley-in qarşılaşması idi. Bu oyunlar müntəzəm çempionat matçlarından fərqli olur. İlk növbədə öz komandamı təbrik edirəm. Oyuna çox yaxşı başladıq.  "Quba" komandası daha çox zona müdafiəsindən istifadə edib səhvlərimizdən yararlanmağa çalışdı. Onlar eyni zamanda ribaundlar sayəsində xal qazanmağa da cəhd edirdi. Bəzən bunu bacarırdılar. Buna baxmayaraq, oyun tempini əlimizdə saxlayıb sona qədər mübarizə apardıq. Overtaymda da uğurlu çıxış etdik. İlk oyunda qalib gəlmişik deyə cavab matçında da rəqibdən üstün olacağıq kimi bir qanun yoxdur. Cavab oyunu da ağır keçəcək. Gücümüzü bir yerə qoyub mərhələ adlamaq istəyirik".

Şəhriyar Əsgərov ("Quba"): "Bərabərsəviyyəli oyun getdi. Levan Qoqaladze və Zaur Paşayevin olmamasına görə məcburiyyətdən oyun sistemini dəyişdik. Rəqib tərəfdən kəskin müdafiə var idi. Şansımız çox deyildi. Oyunçularımız pis oynamadı. Belə matçlarda gərək oyunun taleyini əsas vaxtda həll edəsən. Overtayma yorğun çıxdıq. Oyunun təsirindən çıxa bilməmişik. Amma qarşıdakı matça nikbin baxıram. Çalışacağıq ki, qalib gələk. Əlimizdən gələnin hamısını etdik. Oyunçulardan narazılığım da yoxdur. Hamısı yaxşı oynadı. Liderin yoxluğunda özümüzü yaxşı göstərdik. 2-ci matçda qalib gəlməyə çalışacağıq".