"Sərhədçi" Azərbaycan Basketbol Liqasının pley-in mərhələsinin ilk oyununda səfərdə “Sumqayıt” üzərində 123:97 hesablı qələbə qazanıb.

Prosport.Az xəbər verir ki, matçdan sonra hər iki komandanın baş məşqçisi fikirlərini bölüşüb:

Evren Alkaya ("Sərhədçi"): “Sumqayıt”ın meydanında bu cür qələbə qazanmaq bizim üçün çox yaxşıdır, sevincli durumdur. Sürətli mövqe hücumları ilə oyunumuzu göstərə bildik. "Üçlük”lərimiz də səbətə düşdü, fərqli bir meydança olmasına baxmayaraq bunu bacardıq. “Sumqayıt” yaxşı, fərqli komandadır və bunu bu gün göstərdilər. Daha yaxşı hazırlaşıb öz meydanımızda növbəti mərhələyə keçmək istəyirik. Rəqibə hörmət edirik və daha yaxşı hazırlaşacağıq. Cared Baynum özünü yaxşı hiss etmədiyi üçün oynamadı. Antonio Uliyams sona qədər meydanda oldu və çox yoruldu. Cavab matçına tam heyətlə çıxıb daha yaxşı oynayacağıq".

Vadim Kuramşın ("Sumqayıt"): "Matçın əvvəlində oyunumuz alınmadı. Ribaundları tamamilə uduzduq. Yenə də fərdi oyuna üstünlük verdik. Həmişə 3 xallıq atışlardan məharətlə istifadə edirdik, bu dəfə alınmadı. Nəticə gözlənilən idi. Rəqib bu gün 123 xal topladı ki, bu da mövsümdə bizim üçün ən pis göstərici oldu. Səbəb məlumdur: müdafiə oluna bilmədik. İkinci oyunda vəziyyəti dəyişməyə çalışacağıq. Ümidimizi itirmirik".