Azərbaycanın qadın güləşçisi Alyona Kolesnik Slovakiyanın paytaxtı Bratislavada keçirilən Avropa çempionatında yarımfinala yüksəlib.

Prosport.Az xəbər verir ki, 59 kq çəki dərəcəsində çıxış edən idmançı 1/4 finalda belaruslu Alesiya Hetmanavaya 7:2 hesabı ilə qalib gəlib.

Bu gün mübarizəyə qoşulan Azərbaycanın digər qadın güləşçisi Elnurə Məmmədova (55 kq) isə təsnifat mərhələsində rumıniyalı Biatris Ferentə "tuş"la məğlub olub.

Bu gün, həmçinin Azərbaycanın sərbəst güləşçilərindən Ağanəzər Novruzov (74 kq) bürünc medal uğrunda Ramazan Ramazanovla (Bolqarıstan), Osman Nurməhəmmədov (92 kq) və Giorgi Meşvildişvili (125 kq) isə finalda müvafiq olaraq, Dauren Kuruqluev (Yunanıstan) və Solomon Manaşvili (Gürcüstan) ilə qarşılaşacaq.

Qeyd edək ki, ötən gün sərbəst güləşçilərdən İslam Bazarqanov (57 kq), Əli Rəhimzadə (65 kq) və Kənan Heybətov (70 kq) bürünc mükafata sahib çıxıblar.

Avropa çempionatına aprelin 13-də yekun vurulacaq.