Serbiyada keçirilən U-15 Gimnaziadada taekvondoçuların mübarizəsində ilk gün başa çatıb.

Prosport.Az xəbər verir ki, Pojeqa şəhərində təşkil edilən yarışda Azərbaycan millisinin 6 idmançısı çıxışını medalla başa vurub.

Qızların mübarizəsində Rüqəyya Əliyeva (33 kq) finalda braziliyalı Maria Eloyza de Almeydaya qalib gələrək 1-ci yeri tutub.

Mədinə Aslanlı (29 kq) həlledici raundda tailandlı Anya Xansukiyə məğlub olaraq gümüş medal əldə edib. 44 kq-da Mehriban İsmayıllı yarımfinalda tayvanlı Vui-Ni Çanqa, 59 kq-da Gülnaz Abdullayeva isə çinli Du Ruisiyə uduzaraq bürünc medallarla kifayətlənib.

Oğlanlarda Əbil Mehrəli (45 kq) finalda iranlı Martia Şəmsizadəyə, Saleh Heydərov (53 kq) isə yarımfinalda braziliyalı idmançıya məğlub olub. Təmsilçilərimiz müvafiq olaraq, gümüş və bürünc medallara sahib çıxıb.

Taekvondoçularımızdan Sabir Məmmədli (33 kq), Nicat Nadirov (41 kq), Aysu Aslanlı (41 kq) və Həqiqət Ələsgərli (51 kq) mübarizəni 1/4 finalda dayandırıb.

Beləliklə, takvondoçularımız günü 1 qızıl, 2 gümüş və 3 bürünc medalla bitirib. Bu növ üzrə yarışlar sabah yekunlaşacaq.

Qeyd edək ki, Azərbaycan millisinin hesabındakı medal sayı 39-a yüksəlib. Bununla da Azərbaycanda medal əyarı belə olub: 11 qızıl, 11 gümüş və 17 bürünc medal əldə edib.