Azərbaycanın üç sərbəst güləşçisi Slovakiyanın paytaxtı Bratislavada keçirilən Avropa çempionatında yarımfinala yüksəlib.

Prosport.Az xəbər verir ki, Ağanəzər Novruzov (74 kq) 1/4 finalda gürcüstanlı Avropa çempionu Giorgi Elbakidzeyə 5:3, Osman Nurmaqomedov (92 kq) belaruslu Yaraslav Yadkovskiyə 10:0, Giorgi Meşvildişvili (125 kq) isə bolqarıstanlı 3 qat Avropa mükafatçısı Vladislav Baytsayevə 5:0 hesabı ilə qalib gəlib.

Növbəti raundda Novruzov albaniyalı Çermen Vəliyevlə, Nurmaqomedov gürcüstanlı Miriani Maysuradze ilə, Meşvildişvili isə Yanis Xramiankovla (UWW) üz-üzə gələcəklər.

Bu gün mübarizəyə qoşulan Azərbaycanın digər sərbəst güləşçiləri Nürəddin Novruzov (91 kq) 1/4, Arseni Cioyev (86 kq) 1/8 finalda uduzublar.

Ötən gün xalça üzərinə çıxan sərbəst güləşçilərimizin isə bürünc medal uğrunda qarşılaşacağı rəqiblər dəqiqləşib. İslam Bazarqanov (57 kq) bolqarıstanlı İvaylo Tisovu, Əli Rəhimzadə (65 kq) ukraynalı Andrey Sviridi, Kənan Heybətov (70 kq) macarıstanlı İsmayıl Musukayevi sınağa çəkəcək. Orxan Abasov (79 kq) isə təsəlliverici görüşdə uduzaraq, qitə çempionatını mükafatsız başa vurub.

Qeyd edək ki, Avropa çempionatı aprelin 13-də yekunlaşacaq.

10:04

Slovakiyanın paytaxtı Bratislavada keçirilən Avropa çempionatında Azərbaycanın daha 5 sərbəst güləşçisi bu gün mübarizəyə qoşulacaq.

Prosport.Az xəbər verir ki, yarışın ikinci günündə Nurəddin Novruzov (61 kq), Ağanəzər Novruzov (71 kq), Arseniy Cioyev (86 kq), Osman Nurmaqomedov (92 kq) və Georgi Meşvildeşvili (125 kq) ilk görüşlərini keçirəcək.

Bu gün həmçinin Orxan Abasov (79 kq) təsəlliverici görüşə çıxacaqsa, İslam Bazarqanov (57 kq), Əli Rəhimzadə (65 kq) və Kənan Heybətov (70 kq) bürünc medal uğrunda yarışacaq.

Qeyd edək ki, Avropa çempionatı aprelin 13-dək davam edəcək. Görüşlər hər gün, Bakı vaxtı ilə saat 12:30-da start götürəcək.