U-15-lər arasında Gimnaziadada yunan-Roma güləşçiləri 9 medal qazanıb.

Prosport.Az xəbər verir ki, Serbiyanın Luçani şəhərində keçirilən yarışa 10 çəki dərəcəsində qatılan Azərbaycan millisinin 9 idmançısı fəxri kürsüyə yüksəlib.

Komandanın heyətində Hüseyn Əmrahlı (38 kq) finalda Volodimir Serjanyuka (Ukrayna), İsfahan Həsənov (75 kq) Martin Fodora (Serbiya) və Zöhrab Səfərov (85 kq) Əmirrza Mehritalarpoştiyə (İran) qalib gələrək qızıl medal qazanıb.

Əli Cavadlı (41 kq) Armin İsmailiyə (İran), Amin Məmmədov (44 kq) Yusif Zareiyə (İran) məğlub olduqlarından 2-ci yeri tutub.

Abdurahman Hüseynli (48 kq) Draqan Tankosiçə (Serbiya), Qurban Məcnunov (52 kq) Andrey Pelyana (Rumıniya), Eldəniz Allahverdiyev (57 kq) Daniil Şevçenkoya (Ukrayna), Əli Məmmədov (68 kq) isə Petar Qavriçə (Serbiya) qalib gələrək bürünc medal qazanıb.

Beləliklə, yunan-Roma güləşçilərimiz Gimnaziadanı 3 qızıl, 2 gümüş və 4 bürünc mükafatla başa vurub. Xatırladaq ki, dünən sərbəst güləşçilərimiz 2 qızıl, 3 gümüş və 5 bürünc medal əldə etmişdi.

Qeyd edək ki, Azərbaycan millisinin hesabındakı medal sayı 23-ə yüksəlib. Hazırda Azərbaycanın aktivində 8 qızıl, 5 gümüş və 10 bürünc medal var.