Slovakiyanın paytaxtı Bratislavada güləş üzrə Avropa çempionatına start verilib.
Prosport.Az xəbər verir ki, ilk yarış günündə sərbəst güləş üzrə 57, 65, 70, 79 və 97 kq-da finalçılar müəyyənləşib.
Mübarizəyə 1/4 finaldan qoşulan İslam Bazarqanov (57 kq) ötən il Avropa 2-cisi olmuş türkiyəli Muhammet Karavuş üzərində inamlı qələbə qazanıb – 8:1. Bazarqanov yarımfinalda rusiyalı Avropa ikincisi Naçın Monquşa 0:5 hesabıyla məğlub olub və sabah bürünc medal uğrunda güləşəcək. Rəqib İvaylo Tisov (Bolqarıstan) – Manvel Xndzrtsyan (Ermənistan) görüşünün qalibi olacaq.
Əli Rəhimzadə (65 kq) əvvəlcə Dağıstan əsilli belçikalı Ayub Musayevə şans tanımayıb – 7:2. Həmyerlimiz 1/4 finalda isə almaniyalı Niko Meqerleyə tam üstünlüklə (10:0) qalib gəlib. Rəhimzadə yarımfinalda çeçen əsilli Fransa güləşçisi Həmzət Arsamerzoyevə minimal fərqlə (3:4) uduzub. Əli bürünc medal uğrunda Stefan Koman (Rumıniya) – Andrey Svirid (Ukrayna) görüşünün qalibiylə güləşəcək.
Kənan Heybətov (70 kq) ilk mərhələdə avstriyalı Benedikt Huberi vaxtından əvvəl məğlub edib – 10:0. Güləşçimiz 1/4 finalda bolqarıstanlı Mihail Georgiyevdən güclü olub – 4:1. Heybətov yarımfinalda rusiyalı dünya çempionu David Bayevə 0:3 hesabıyla məğlub olub. Kənan 3-cü yer uğrunda ya İsmayıl Musukayev (Macarıstan), ya da Viktor Voynoviç (Serbiya) ilə mübarizə aparacaq.
Orxan Abasov (79 kq) təsnifat mərhələsində Dağıstan əsilli fransalı Zəlimxan Hacıyevə 5:9 hesabıyla uduzub. Rəqib finala yüksəldiyi üçün Orxan sabah təsəlliverici görüşdə Slovakiyanı təmsil edən Axsarbəy Qulayevlə qarşılaşacaq.
Əbubəkr Abakarov (97 kq) ukraynalı Vasil Sovaya “tuş”la (9:5) qalib gəlsə də, 1/4 finalda macarıstanlı Rixard Veqə 2:5 hesabıyla məğlub olub.
16:08
Azərbaycanın 3 sərbəst güləşçisi Slovakiyanın paytaxtı Bratislavada keçirilən Avropa çempionatında yarımfinala yüksəlib.
Prosport.Az xəbər verir ki, İslam Bazarqanov (54 kq) 1/4 finalda türkiyəli Muhammet Karavuşa, Əli Rəhimzadə (65 kq) almaniyalı Niko Meqerleyə, Kənan Heybətov (70 kq) isə bolqarıstanlı Mihail Georgiyevə qalib gəlib.
Onlar yarımfinal mərhələsində müvafiq olaraq, Naçın Monquş (UWW), Həmzət Arsamerzoyev (Fransa) və David Bayevlə (UWW) üz-üzə gələcək.
Bu gün mübarizəyə qoşulan Azərbaycanın digər sərbəst güləşçiləri Orxan Abasov (79 kq) təsnifat, Əbubəkr Abakarov (97 kq) isə 1/4 finalda rəqiblərinə uduzub.
Qeyd edək ki, Avropa çempionatı aprelin 13-dək davam edəcək.