Serbiyada keçirilən U-15 Gimnaziadanın ilk yarış günündə sərbəst güləş üzrə Azərbaycan millisi 10 medal qazanıb.
Prosport.Az xəbər verir ki, komandamızın heyətində Elman İsmayılov (38 kq) finalda Marko Kvasnyuku (Ukrayna) məğlub edərək çempion tituluna yiyələnib. Bu, millimizin Gimnaziadada ilk qızıl medalı olub.
İbrahim Həsənov (44 kq) da fəxri kürsünün ən yüksək pilləsinə qalxıb. O, finalda Hüseyn Teymurikoşardan (İran) güclü olub.
Hüseyn Rzazadə (41 kq) həlledici görüşdə Arşia Məhəmmədiyə (İran), Fərid Hüseynli (52 kq) Əhməd Reza Sələrvəndiana (İran) və Məhəmməd Həsənli (62 kq) Məhəmməd Mehdizadəvalukolayiyə (İran) məğlub olduqlarından, gümüş medalla kifayətlənib.
Bürünc medal uğrunda görüşdə isə Tamerlan Namazlı (48 kq) Nurtas Bissenbaya (Qazaxıstan), Elcan Həsənov (57 kq) İvan Ulriçə (ABŞ), Xəyal Şükürlü (68 kq) Şahen Martirosyana (Ermənistan), Elvin Nəcəfzadə (75 kq) Patrik Zolda (Rumıniya), Tural Eynullayev (85 kq) isə Bakit Əlibəyə (Qazaxıstan) qalib gəlib.
Beləliklə, 2 qızıl, 3 gümüş və 5 bürünc medal qazanan sərbəst güləş üzrə yığmamız komanda hesabında 2-ci olub.
Qeyd edək ki, Azərbaycan millisinin Gimnaziadada medal sayı 11-ə yüksəlib. Komandamızın heyətində daha öncə sablyaçımız Gəray Məmmədli 3-cü yeri tutub.
16:21
Serbiyada keçirilən U-15 Gimnaziadanın ilk yarış gününə Azərbaycan güləşçiləri uğurlu start verib.
Prosport.Az xəbər verir ki, Serbiyanın Luçani şəhərində keçirilən güləş yarışlarına 10 çəki dərəcəsində qatılan sərbəst güləş üzrə Azərbaycan millisinin hər bir idmançısı medal şansını davam etdirir.
Məşqçilər Namiq Quliyev və Elşad Allahverdiyevin rəhbərliyi altında Gimnaziadada mübarizə aparan komandanın heyətində Elman İsmayılov (38 kq), Hüseyn Rzazadə (41 kq), İbrahim Həsənov (44 kq), Fərid Hüseynli (52 kq) və Məhəmməd Həsənli (62 kq) finala vəsiqə qazanıb.
Tamerlan Namazlı (48 kq), Elcan Həsənov (57 kq), Xəyal Şükürlü (68 kq), Elvin Nəcəfzadə (75 kq) və Tural Eynullayev (85 kq) isə bürünc medal uğrunda güləşəcək.
Həlledici görüşlər Bakı vaxtı ilə saat 18:00-da başlayacaq.
Qeyd edək ki, Azərbaycan millisi hələlik 1 bürünc medal qazanıb. Bu, qılıncoynatmada Gəray Məmmədlinin aktivindədir.