NTD Azərbaycan Basketbol Liqasının XX turunda “Sərhədçi”yə 77:103 hesabı ilə uduzub.

Prosport.Az xəbər verir ki, hər iki komandanın baş məşqçisi matçla bağlı fikirlərini bölüşüb.

Tahir Baxşıyev (NTD): "Bu bizim müntəzəm mövsümdə son oyunumuz idi. Kubok oyunlarından sonra komandada yorğunluq var idi. Zədələrə görə Tayri Boykin və Əkbər Məmmədov oyunu buraxırdılar. Həmçinin Detrik Brauninqə istirahət verdik. O, kubokun yarımfinal və finalında 40 dəqiqə meydançada olmuşdu. Amma hər oyundan fayda götürmək lazımdır. Hüseyn Məmmədov və Oğuzxan Quliyev daha çox oynadı. Məhəmməd Bazzi və Hacısəməd Oğuz da özlərini göstərmək imkanı əldə etdilər. Hacısəməd yüksək liqada ilk xallarını qazandı. Bu, hər bir basketbolçu üçün əlamətdar hadisədir. İndi bütün fikrimiz pley-inn mərhələsindədir. Hazırlaşacağıq".

Evren Alkaya ("Sərhədçi"): "Əslində, çətin oyun olmadı. NTD kubok matçlarından sonra yorğun idi. 10 gün ərzində 3 matç oynadılar. Yorğunluq istər-istəməz var idi, bir az da pley-inn matçları üçün heyətlərini qorudular. Biz də çox rotasiya etdik. Normalda mövsüm sonunda bu cür matçlar oynanılır. Pley-offda uğurlu olmaq üçün əlimizdən gələni edəcəyik. Mövsüm bizim üçün çox da yaxşı olmadı. Yaxşı oyunçularımızın bir çoxu zədələndi. Komandanın özəyini dəyişdirmək üçün çox transfer etdik. Düşünürəm ki, pley-offun ikinci hissəsinə qədər komandamız tam uyğunlaşar. Pley-offda sona qədər mübarizə aparacağıq”.