"İlk hissəni çox pis oynadıq. Amma 2-ci hissədə strategiyamızı dəyişdirdik və asan qələbə qazandıq".

Prosport.Az xəbər verir ki, "Şəki" basketbol klubunun baş məşqçisi Bedri Meriç deyib.

Türkiyə mütəxəssis Azərbaycan Basketbol Liqasının XX turunda “Lənkəran” üzərində qazanılan 107:78 hesablı qələbəni şərh edib: "Əla nəticəyə nail olduq. "Şəki" üçün mövsümün əvvəlindən qoyduğumuz hədəfə çatdıq. Amma bu o demək deyil ki, mövsüm bitdi. Bundan sonra xəyallarımızın arxasınca düşəcəyik. Bunun üçün də sonadək mübarizə aparacağıq. Bütün heyətlə qürur duyuram. Həqiqətən əla mövsüm keçirdik. Heç vaxt qoyduğumuz hədəfə çatmaqdan vaz keçmədik. Zədəlilərimiz oldu, çətin oyun təqvimi ilə üzləşdik. Sonadək döyüşdük və layiq olduğumuzu aldıq.

Mövsümün əvvəlində bizə çox şans verilmirdi. Amma biz pley-offa çıxacağımıza inanırdıq. Bu tamamilə oyunçuların əsəri və uğurudur. Bütün oyunçulara və heyətə təşəkkür edirəm. Dediyim kimi, hədəfimizə çatdıq, amma xəyallarımız üçün mübarizə aparmağa davam edəcəyik"