Bugünlərdə ölkəmizdə 150-dək ölkənin bədən tərbiyəsi və idman sahəsinin məsul qurumlarının rəhbərləri və nazirlərinin iştirakını əhatə edən MINEPS VII konfransı keçirilir.

Prosport.Az xəbər verir ki, tədbirlər çərçivəsində Braziliyanın idman naziri Ana Mozer də Azərbaycandadır.

Xanım nazirlə Braziliyanın ölkəmizdəki səlahiyyətli səfiri Manuel Monteneqro və Azərbaycan Braziliya Ciu-citsu Federasiyasının prezidenti Aqil Acalov arasında görüş baş tutub. Görüş zamanı A.Acalov ölkədə idmanın mövcud dinamikasından və perspektivlərindən söz açıb, səfir Monteneqronun sözügedən Braziliya döyüş sənətinin ölkəmizdə inkişafına daim dəstək göstərdiyini minnətdarlıqla bildirib. Bundan əlavə federasiya prezidenti hər iki rəsmiyə Azərbaycan Braziliya Ciu-citsu Federasiyasının inkişaf strategiyaları, görülən işlər, təşkil edilən tədbirlər barədə məlumat verib.

Sabiq voleybolçu olan Ana Mozer Braziliya idman növlərinin Azərbaycanda inkişafından və bu döyüş növünə olan maraqdan dolayı məmnunluğunu və dinamik inkişafı dəstəklədiyini bildirib.