"Gəncə" basketbol üzrə Azərbaycan Kubokunun yarımfinalında "Naxçıvan"a 86:80 hesabı ilə qalib gələrək finalda NTD-yə rəqib olub.

Prosport.Az xəbər verir ki, qarşılaşmadan sonra hər iki komandanın baş məşqçisi matçla bağlı fikirlərini bölüşüb.

Halil Atlı ("Gəncə"): "Rəqibi mübarizə əzminə görə təbrik edirəm. “Naxçıvan”nın baş məşqçisi çempionatda təcrübəlilərdəndir. Böyük hədəflər üçün mübarizə aparmağa alışmış mütəxəssisdir. Belə bir rəqibə qalib gəldiyimizə görə sevincliyik. Komandamı təbrik edirəm. Meydançaya daxil olan bütün oyunçularımız möhtəşəm oyun göstərdilər. Əvvəlcədən danışdığımız planları reallaşdıra bildik. Qələbəmiz Gəncəyə, azarkeşlərə ərmağan olsun. Növbəti matçımız finaldır. İnşallah, kuboku qazanmaq istəyirik".

Murat Dikmən ("Naxçıvan"): "Performansımızı iki hissəyə bölmək lazımdır. İlk yarı və ikinci hissə fərqli çıxış etdik. Birinci hissədə həm müdafiədə, həm də hücumda istədiyimiz kimi oynaya bilmədik. Buna görə də hücum ritmimizi yaxalaya bilmədik. Üçüncü periodda müdafiədə sərtliyimizi artıraraq rəqibimizi dayandırmağa çalışdıq. Geridönüş etdik hətta önə də keçdik, ancaq sonunu gətirə bilmədik. Qələbə qazana biləcəyimiz matçı əlimizdən verdik. Uzun oyunçularımız çox pis performans sərgilədilər. Rəqibimizin 11 hücum ribaundu götürməsi bizim müdafiədə nə qədər zəif çıxış etdiyimizi göstərir. “Gəncə” klubunun yerli basketbolçusu Cəbrayıl Əkbərov çox yaxşı çıxış etdi. Xüsusilə onu vurğulamaq istəyərdim. Onun performansı matçın taleyinə aydınlıq gətirdi. Bundan sonra isə çempionata köklənəcəyik".

Qeyd edək ki, final matçı martın 30-da keçiriləcək.