Rusiya və Belarus pasportlarına malik idmançılar və onların nümayəndə heyəti mayın sonunda Bakıda keçiriləcək taekvondo üzrə dünya çempionatına buraxılacaqlar.

Prosport.Az xəbər verir ki, bu barədə aprelin 3-də Ümumdünya Taekvondo Şurasının fövqəladə iclasında qərar verilib.

Məhz müzakirələrdən sonra Şura Bakıdakı dünya çempionatında Rusiya və Belarus pasportlarına malik idmançıların neytral statusda iştirakına icazə verilməsi barədə qərar qəbul edib. Digər yarışlarda onların iştirakı barədə qərar isə dünya çempionatından sonra veriləcək.

Şura həmçinin həmin idmançıların neytrallığını müəyyən etmək (Rusiya və ya Belarus siyasi elitası ilə əlaqəsinin olub-olmaması, hərbi əməliyyatlarda iştirak edib-etməmələrini müəyyənləşdirmək – red.) üçün Nəzarət Komitəsinin yaradılmasını və yoxlama prosesini təsdiqləyib. Yoxlama prosesi 3 mərhələdən ibarət olacaq.

Qeyd edək ki, Bakıda dünya çempionatı 29 may – 6 iyun tarixlərində keçiriləcək.