"Şəki" Azərbaycan Basketbol Liqasının B qrupunda yenidən liderliyi ələ keçirib.

Prosport.Az xəbər verir ki, komanda bunadək eyni xala malik "Gəncə" ilə matçda geridə olsa da, son transfer Tomi Lyukun 3 sərbəst atışı ilə hesabı bərabərləşdirib – 83:83. Bu, "Şəki" klubunun tarixində ilk over-tayma gedən matç olub. Əlavə vaxtda isə "Şəki" daha dəqiq oynayaraq 91:87 qalib gəlib.

Bununla da "Şəki" əsas rəqibini 1 xal qabaqlayaraq lider olub. Müntəzəm çempionatın növbəti – son turunda "Şəki" "Lənkəran"la səfərdə, "Gəncə" isə "Sumqayıt"la evdə qarşılaşacaq. Hansısa sensasiya baş verməsə, "Şəki" pley-offa vəsiqəni təmin edəcək.