Azərbaycanlı kikboksçu, ölkəmizi Polşada keçirilmiş III Avropa Oyunçularında təmsil etmiş Elşad Şahbazov Moldovanın paytaxtı Kişinyovda baş tutan "FEA Championship" Qran-prisinin qalibi olub.

Prosport.Az-ın xəbərinə görə, Çoresku adına futzal arenasında keçirilən döyüş gecəsində Əməkdar məşqçi, DSX mayoru Fuad Zeynalovun tələbəsi olan Şahbazov (77 kq) əvvəlcə moldovalı Korneliu Lisiyə qalib gəlib. Hakimlərin fərqli qərarına əsasən, qalib əlavə raundda müəyyənləşib. 

Daha sonra "Qara bəbir" ləqəbli idmançımız finalda rumıniyalı Aleksandru Amariteylə döyüşüb. Bu dəfə hakimlərin yekdil qərarına əsasən Elşad Şahbazov qalib elan olunub. Bununla da Elşad K1 qaydaları ilə keçirilən döyüşə görə 3 min dollar mükafat qazanıb.

Fuad Zeynalovun digər tələbəsi olan Qəşəm Məmmədov (85 kq) da bu turnirin Qran-prisində yarışıb. Lakin o, 2-ci raundda moldovalı Artyom Livadara uduzub.

Həmçinin, rinqdə MMA qaydaları ilə keçirilən görüşdə də Ruslan Əfəndiyevin tələbəsi Turan Əhmədov (70,3 kq) döyüşüb. O, yerli idmançı Sergey Keleşə qalib gəlib.