Bu il 5-7 sentyabr tarixlərində Danimarkanın paytaxtı Kopenhagendə keçiriləcək 3x3 basketbolu üzrə Avropa çempionatının seçmə mərhələsində yığmamızın potensial rəqibləri müəyyənləşib.

Prosport.Az-ın xəbərinə görə, ötən il olduğu kimi, Avropa çempionatının seçmə mərhələsi Kosovonun paytaxtı Priştinada keçiriləcək.

7-8 iyun tarixində keçiriləcək yarışda kişilərdə meydan sahibi və millimizdən başqa, daha 4 komanda (İrlandiya, Kipr, Albaniya, Malta) mübarizə aparacaq. Amil Həmzəyevin kapitanı olduğu millimiz reytinqinə görə 3-cüdür.

Qadın komandaların mübarizəsi zamanı isə daha az komanda (5) yarışacaq. Kosovo və yığmamızdan başqa, İrlandiya, Kipr və Malta burada da çıxış edəcək. Qadın millimiz burada İrlandiyadan sonra reytinqinə görə 2-cidir.

Yalnız çempion komandalar Avropa çempionatına vəsiqə qazanacaq.

Xatırladaq ki, ötən il hər iki komandamız Kosovoda çempion olaraq ilk dəfə Avstriyanın paytaxtı Vyanada keçirilən Avropa çempionatına vəsiqə əldə etmişdi.