24-25 mayda Bakıda (See Breeze Resort) keçiriləcək 3x3 basketbolu üzrə dünya çempionatının seçmə mərhələsi üçün ölkəmizə gələcək 10 komanda müəyyənləşib.

Prosport.Az-ın xəbərinə görə, kişilərdə Monteneqro, Kanada, Böyük Britaniya, Ruanda və İran millisi Bakıya gələcək. Reytinqə görə yarışın ən sonuncu komandası olan kişi millimiz B qrupunda Kanada və Böyük Britaniya ilə mübarizə aparacaq. 

Qadın millilərdə isə Bakıya gələcək komandalar Çili, Latviya, Tayvan, Braziliya və Misir yığmalarıdır. Bu komandalar arasında gücünə görə 3-cü sırada olan yığmamız B qrupunda Latviya və Misirlə qarşılaşacaq.

Hər qrupdan ilk 2 komanda yarımfinal oynayacaq. Qalib komandalar və 3-cü yeri tutan yığma dünya çempionatına vəsiqə qazanacaq.

Qeyd edək ki, 23-29 iyunda Monqolustanın paytaxtı Ulan-Batorda keçiriləcək dünya çempionatında son vəsiqələri Bakı turniri verəcək. Bununla da 9-cu dəfə keçiriləcək dünya çempionatının bütün 20 iştirakçısı bəlli olacaq.

Bunadək kişilərdə meydan sahibi Monqolustandan başqa, Avstraliya, Çin, Yaponiya, Avstriya, Belçika, Fransa, Almaniya, Latviya, Litva, Niderland, Serbiya, İspaniya, İsveçrə, Puerto Riko, ABŞ, Madaqaskar, qadınlarda Avstraliya, Çin, Yaponiya, Avstriya, Çexiya, Fransa, Almaniya, Macarıstan, İtaliya, Niderland, Polşa, İspaniya, Ukrayna, Kanada, ABŞ və Madaqaskar dünya çempionatına vəsiqə qazanıb.