"Naxçıvan" basketbol üzrə Azərbaycan Kubokunun 1/4 final mərhələsində "Abşeron"a 102:60 hesabı ilə qalib gəlib.

Prosport.Az xəbər verir ki, matçdan sonra hər iki komandanın baş məşqçisi oyunla bağlı fikirlərini bölüşüblər:

Murat Dikmən (“Naxçıvan”): "Komandam həqiqətən çox yaxşı mübarizə apardı. Bütün heyətin oynamağı və xal toplamağı əlavə olaraq bizi çox xoşbəxt etdi. Gənc oyunçularımıza vaxt verdik və onlar da bizi məyus etmədi. Artıq yarımfinaldayıq, ancaq qarşıda daha bir matç bizi gözləyir. Artıq önümüzdəki liqa matçına köklənəcəyik. Daha sonra isə Kubok görüşü barədə düşünəcəyik. Ümumilikdə, komandanın çıxışdan razı qaldım. Yalnız II periodda hesab arasındakı fərqə görə bir az rahatlaşdıq. Keçən il Kubokun finalında məğlub olmuşduq. Ümid edirəm ki, bu il Kuboku qazanıb azarkeşlərimizə və rəhbərliyimizə hədiyyə edərik".

Ərhan Tokər ("Abşeron"): "Pis oynadıq. Normalda daha yaxşı durumda olan komandayıq. Oyuna çox pis başladıq. Reqlamentə əsasən, 2 yerli basketbolçunun meydana çıxması bizim əleyhimizə oldu. Gənclərin təcrübəsi kifayət qədər deyil. Bu bir səbəbdir, amma əsas deyil. Əslində hər zaman pis müdafiə olunduğumuzu deyirik. Bu dəfə isə çox pis hücum etdiyimiz üçün eyni cür müdafiə olunduq. Sonra tələsdik və hesab arasında fərq böyüdü. Rəqibimiz güclü komandadır. Onlara növbəti mərhələdə uğurlar arzu edirəm. Biz isə liqadakı son oyunlarımız üçün hazırlıqlarımıza davam edəcəyik".