Azərbaycan Basketbol Liqasında XVII tur başa çatıb.

Prosport.Az xəbər verir ki, B qrupunda "Gəncə" ausatyder "Lənkəran"ı qəbul edib.

Gəncə İdman Sarayında keçirilən qarşılaşma meydan sahiblərinin gözlənilən qələbəsi ilə bitib – 90:76.

Saat 19:00-da start götürən B qrupunun digər matçında "Ordu" "Sumqayıt"ın qonağı olub. Sumqayıt Olimpiya İdman Kompleksində keçirilən qarşılaşmada meydan sahibləri ilk dəfə debütanta qalib gəlib – 122:116. Bununla da ümumi xal hesabında mövsümün rekordu qeydə alınıb – 1 oyuna 238 xal. Buna qədər də rekord yenə də Sumqayıtda "Quba" ilə oyunda (126:90) qeydə alınmışdı. Yeri gəlmişkən, bu görüşdə 44 xal toplayan Endryu Louder komandada mövsümün rekordunu müəyyənləşdirib. Bunadək rekord "Quba" ilə matçda 42 xal toplamış "Şəki"nin sabiq kapitanı Aleks Koldvellə məxsus idi.

Xallarının sayını 30-a çatdıran "Gəncə" yenidən ilk sıraya qalxıb. Lakin "Şəki" də eyni xala malikdir. Son 2 oyunda cəzalandırıldığı üçün baş məşqçisiz oyuna çıxan "Ordu" ardıcıl 2-ci yenilgiylə liderlər qrupundan aralanıb – 28 xal. "Sumqayıt" isə xalını 24-ə yüksəldib və artıq qrupu 4-cü sırada başa vuracağı müəyyənləşib. 

Qeyd edək ki, turun daha əvvəl baş tutan görüşlərində NTD "Naxçıvan"ı 85:78, “Sabah” “Neftçi”ni 105:77, “Şəki” “Quba”nı 66:63, "Abşeron" "Sərhədçi"ni 77:75 hesabı ilə məğlub edib.