Azərbaycanın 2 sərbəst güləşçisi Albaniyanın paytaxtı Tiranada keçirilən U-23 Avropa çempionatının finalına yüksəlib.

Prosport.Az xəbər verir ki, Kənan Heybətov (70 kq) qitə birinciliyinə möhtəşəm start verib.

Həmyerlimiz Ukraynanı təmsil edən erməni güləşçi Narek Poqosyan, bolqarıstanlı Kaloyan Atanasov və belçikalı Məhəmməd Əbdürəhmanova 10:0 hesabıyla qalib gələrək adını finala yazdırıb. Kənan qızıl medal uğrunda rusiyalı Məhəmməd Eltemirovla mübarizə aparacaq.

Fərid Cabbarovun (79 kq) da debütü uğurlu alınıb. Milli üzvü gürcüstanlı Giorgi Qoqritçianini (8:4), italiyalı Raffaele Matrullonu (10:0) və İsveçrəni təmsil edən Umar Mavlayevi (3:1) üstələyərək finala yüksəlib. Fərid həlledici görüşdə Rusiya ermənisi Arsen Balayanla üz-üzə gələcək.

Rəhman İmanov (57 kq) təsnifat mərhələsində rusiyalı (U-20) Avopa çempionu və dünya 2-cisi Lev Pavlova 0:3 hesabıyla məğlub olub. Rəqib finala yüksəldiyi üçün güləşçimiz bu gün təsəlliverici görüşdə Şimali Makedoniya təmsilçisi Stefan Şterjovla qarşılaşacaq.

Murad Haqverdiyev (65 kq) ispaniyalı Felipe Miyaya 5:1 hesabıyla qalib gələrək 1/4 finala yüksəlsə də, rusiyalı (U-17) Avropa çempionu Amal Candubayevə məğlub olub – 4:8. Rəqib finala yüksəldiyi üçün Murad bu gün təsəlliverici görüşdə ukraynalı Mikita Qonçarovla güləşəcək.

Abdulcəlil Şabanov (97 kq) təsnifat mərhələsində ermənistanlı Sergey Sarqsyana (3:11) uduzub.

Qeyd edək ki, martın 14-dək davam edəcək Avropa çempionatına Azərbaycanın 27 güləşçisi yollanıb.