Kişi həndbolçulardan ibarət millimizin martın 11-dən 16-dək Bolqarıstanın Varna şəhərində təşkil olunacaq yarışdakı oyun təqvimi bəlli olub. 

Prosport.Az xəbər verir ki, 5-ci dəfə keçiriləcək Həndbolu inkişaf etməkdə olan ölkələrin çempionatında 2-ci səbətdə yer alan millimiz püşkatma olmadan B qrupuna salınıb.

Turnirin açılış matçını da millimiz edəcək. Komandamız martın 11-də Moldova ilə qarşılaşacaq. Bakı vaxtı ilə saat 15:30-da həmin oyun başlanacaq. Ertəsi gün Nigeriya, martın 13-də isə ABŞ ilə oyun keçirəcəyik.

Qrupda ilk 2 yeri tutan komandalar martın 15-də yarımfinal, son 2 yeri tutanlar isə sıralama üçün oynayacaq. Martın 16-da isə final, 3-cü, 5-ci və 7-ci yerlərin sahiblərini müəyyənləşdirmək üçün oyunlar baş tutacaq. 

Qeyd edək ki, A qrupunda meydan sahibi Bolqarıstan, Böyük Britaniya, Kipr və Paraqvay komandaları yarışacaq.