"Gəncə" Azərbaycan Basketbol Liqasının XVI turunda “Quba”nı 93:81 hesabı ilə məğlub edib.

Prosport.Az xəbər verir ki, hər iki komandanın baş məşqçisi matçla bağlı fikirlərini bölüşüblər:

Halil Atlı ("Gəncə"): "5 mart – Bədən Tərbiyəsi və İdman Günü Gəncə şəhəri üçün düşərli oldu. Bizdən əvvəl "Kəpəz" əzəli rəqibi üzərində qələbə qazandı. Qalib gəlmək növbəsi bizə gəldi. Biz də layiqli qələbə qazandıq. Həm "Kəpəz"i, həm də basketbolçularımızı təbrik edirəm. Gəncə üçün ən yaxşısını etməyə davam edəcəyik. Sıx qrafik ilə oynayırıq. Rotasiyalardan istifadə edərək mübarizə apardıq. Basketbolçuların zədələnməməsi bizim üçün əsasdır. Yeni transferimiz də bu gün meydançada idi. Onu oyuna çatdıran klub nümayəndələrimizə xüsusi minnətdaram. Federasiya da bu işdə əmək sərf etdi, sağ olsun. Komandamız günü-gündən daha yaxşı olacaq. Oyun sistemini keyfiyyətli basketbolçularla inkişaf etdiririk. Komandada hər kəs öz rolunu bilir. Bu məni çox sevindirir. Amma çatışmazlıqlarımız da var. Bunun üzərində işləyəcəyik. Bu oyunu unudub qarşıdakı matça diqqətimizi çevirəcəyik. Azarkeşlərimizi yanımızda görmək istəyirik. Onların dəstəyinə ehtiyacımız var".

Şəhriyar Əsgərov ("Quba"): "Matça yaxşı hazırlaşmışdıq. Ağır görüş olacağını bilirdik. Əslində, yaxşı da oyun göstərdik. Sadəcə, qırılma nöqtələri oldu. Əlimizdən gələni etdik. Simeon Körkləndin olmaması da öz təsirini göstərdi. "Gəncə"nin gücünü yaxşı başa düşürdük. Sona qədər mübarizə apardıq. Amma istədiyimiz nəticəni əldə edə bilmədik. Təəssüf ki, bu cür nəticə qeydə alındı. Oyunun videosuna baxıb, analiz edəcəyik. Çalışacağıq ki, növbəti görüşdə qələbə qazanaq. Lakin çətin olacağı da dəqiqdir. Başqa çıxış yolumuz yoxdur, mübarizə aparacağıq".