"Təşkil etdiyimiz hücumlar zamanı topun səbətə göndərilməsində ciddi problemlər yaşadıq".

Prosport.Az xəbər verir ki, bunu “Ordu”nun baş məşqçisi Alberto Blanko Azərbaycan Basketbol Liqasının XVI turunda “Şəki”yə qarşı keçirdikləri oyundan sonra deyib.

Cəzalı olduğu üçün matçı tribunadan izləyən ispaniyalı mütəxəssis rəqibin imkanlardan daha yaxşı istifadə etdiyini vurğulayıb: “İlk olaraq “Şəki” klubunu qələbə münasibəti ilə təbrik edirəm. Bu gün aparıcı oyunçularımızın fəallığı ilə nəticə qazanmaq istəyirdik. Bütün planlarımızı buna uyğun qurmuşduq. Ancaq bizim günümüz deyildi. Əvvəla, atışlarda çox zəif təsir bağışladıq. Demək olar ki, təşkil etdiyimiz hücumlarda topun səbətə göndərilməsində ciddi problemlər yaşadıq. Digər tərəfdən onlar bu gün "pick and roll" vəziyyətlərindən daha yaxşı istifadə etdi. Bu 2 səbəbə görə oyunda uduzduq. Artıq bu oyunu yaddan çıxarmalı və “Sumqayıt”la qarşılaşmaya hazır olmalıyıq”.

Qeyd edək ki, "Şəki" – "Ordu" qarşılaşması meydan sahiblərinin 89:74 hesablı qələbəsi ilə bitib.