Azərbaycan millisinin i2 boksçusu Bolqarıstanın paytaxtı Sofiyada keçirilən beynəlxalq “Stranca” turnirində finala yüksəlib.

Prosport.Az xəbər verir ki, Zəlimxan Süleymanov (57 kq) və Zaur Qəhrəmanov (67 kq) yarımfinal döyüşlərini qələbə ilə başa vurub.

Süleymanov finala gedən yolda Giorgi Kapanadze (Gürcüstan) ilə döyüşüb. Görüş boksçumuzun 4:1 hesablı qələbəsi ilə yekunlaşıb. O, qızıl medal uğrunda qarşılaşmada Xujanəzər Nortojyevlə (Özbəkistan) üz-üzə gələcək.

Qəhrəmanov Demur Kajayadan (Gürcüstan) güclü olub. O, 5:0 hesabı ilə qalib gəlib. Təmsilçimiz finalda Törəxan Sabirxanla (Qazaxıstan) gücünü yoxlayacaq.

Digər boksçularımızdan Nicat Hüseynov (51 kq) və Nəbi İsgəndərov (67 kq) yarımfinalda məğlub olduqları üçün turniri bürünc medalla başa vurub. Hüseynov Daniyal Sabitlə (Qazaxıstan) qarşılaşmanın 2-ci raundunda zədələndiyindən, döyüşü davam etdirə bilməyib. İsgəndərovun Törəxan Sabirxanla (Qazaxıstan) görüşündə isə rəqib 3:2 hesabı ilə qələbə qazanıb.

Qeyd edək ki, kişilərdə finallar Bakı vaxtı ilə saat 20:30-dan etibarən başlayacaq.