Ümumdünya Kikboksinq Təşkilatları Assosiasiyasının (WAKO) prezidenti Roy Beyker və WAKO-nun vitse-prezidenti, Türkiyə Kikboksinq Federasiyasının prezidenti Salim Kayıcı Azərbaycanda səfərdə olacaq.

Prosport.Az-ın xəbərinə görə, sabah Bakıya gələcək qonaqlar martın 5-dək bir sıra görüşlər keçirəcək.

İrlandiyalı və türk qonaqlar ilk öncə Fəxri Xiyabanda Heydər Əliyevin məzarını və Şəhidlər Xiyabanını ziyarət edəcək. Daha sonra qonaqların Milli Olimpiya Komitəsinin və Gənclər və İdman Nazirliyinin rəhbərliyi ilə görüşləri planlaşdırılıb.

Bundan başqa, onların Azərbaycan Kikboksinq Federasiyanın fəxri prezidenti, Suraxanı rayon İcra Hakimiyyətinin başçısı Adil Əliyevlə və Azərbaycan Kikboksinq Federasiyanın prezidenti Orxan Əliyevlə görüşləri nəzərdə tutulub.

Qeyd edək ki, Roy Beyker sonuncu dəfə Bakıda 2021-ci ilin mayında olub. Həmin vaxt böyüklər, gənclər və yeniyetmələr arasında dünya və ya Avropa çempionatının Bakıda keçirilməsi müzakirə edilib.