"Naxçıvan" Azərbaycan Basketbol Liqasının XV turunda "Sabah"a 85:82 hesabı ilə qalib gəlib.

Prosport.Az xəbər verir ki, matçda sonra hər iki komandanın baş məşqçisi oyunla bağlı fikirlərini açıqlayıblar.

Murat Dikmən ("Naxçıvan"): "Milli komandaların oyunları ilə əlaqədar yaranmış fasilə zamanı 1 həftə hazırlaşaraq bu qarşılaşmaya çıxdıq. 3-cü periodda artıq bu hiss olundu. Yorulduq və sadə top itkilərinə yol verdik. Amma yekunda təcrübəmizlə oyuna nəzarəti əlimizə alaraq qələbə qazandıq. Bu gün 2 yeni oyunçumuz da yaxşı mübarizə apardı. Əlavə olaraq da Papuna Kritadzeni vurğulamaq istəyərdim. O, Nəzər Quliyevin zədəsindən sonra oyuna daxil oldu və həqiqətən də yaxşı çıxış etdi. Həm müdafiədə, həm də hücumda yaxşı işlər gördü. Hər zaman dediyim kimi, basketbol bir komanda oyunudur. Rəqibimizi də təbrik edirəm. Çox dəyərli komandadır, baş məşqçiləri də həmçinin. Artıq şəxsi görüşlərdəki nəticələrə əsasən yenidən liderik. Ümid edirəm ki, normal mövsümün son 5 matçını da qazanaraq çempionatı lider tamamlayarıq".

Rimas Kurtinaitis ("Sabah"): “Rəqibi təbrik edirəm. Layiqli qələbə qazandılar. Oyunda üstün tərəf onlar idi. Buna baxmayaraq, sonda şanslarımız var idi. Fasilədən sonra ilk oyunumuzda çox səhvlər etdik. Səbət altında mübarizəni uduzduq. Amma mövsüm davam edir. Səhvlərimizdən nəticə çıxaracağıq”.