"Önəmli olan ölkə kubokunda və çempionatda yaxşı nəticə qazanmaqdır".

Prosport.Az xəbər verir ki, bunu “Sərhədçi”nin baş məşqçisi Evrən Alkaya Azərbaycan Basketbol Liqasının XV turunda qarşılaşacaqları NTD ilə matçdan öncə söyləyib.

O, komandada yolları ayırmaq istədikləri oyunçuların olduğunu bildirib: “Milli komandalara görə uzun bir fasilə oldu. Biz də uğursuz seriyamızı dayandırmaq üçün istədiyimizi əldə edə bilmədiyimiz oyunçularla yolları ayırdıq. Hələ də ayrılmaq ərəfəsində olduğumuz oyunçular var. Onların yerinə yeniləri gəldi. Bu fasilə müddətində komandaya çox istirahət vermədik, xeyli sayda məşqlər keçdik. Çünki belə uzun fasilələr zamanı komandanı formada saxlamaq lazımdır. Lazımi işləri gördük, yeni gələn oyunçuları komandaya uyğunlaşdırmağa çalışırıq. Qarşımızda NTD klubu var və son zamanlarda yaxşı işlər görürlər. Heyəti gücləndiriblər, çox yaxşı komandadırlar".

Mütəxəssis qrupu ən yüksək pillələrdə bitirəcəklərinə inandığını söyləyib: "Bizim komandamız da yaxşıdır. Hər mövqedə güclü oyunçularımız var. Sadəcə, bu, son oyunların nəticələrində əksini tapmadı. Əksiklərimizi aradan qaldırmağa, sona qədər meydanda mübarizə aparan kollektiv olmağa çalışdıq. Hər kəs “Sərhədçi”nin necə komanda olduğunu bilir. Biz bu liqada ən üst səviyyəyə çıxacaq komandayıq. 4 nömrə mövqeyində dəyişiklik etdik və bununla da sistemi dəyişdik. NTD ilə matç çox vacibdir. Əlimizdən gələni etməyə, ən yaxşı oyunlarımızdan birini oynamağa çalışacağıq. Yuxarı pillələrdə qərarlaşmaq istəyirik. III dövrənin son oyunudur. Daha sonra son qrup matçları baş tutacaq. İnanıram ki, qrupu ən yuxarı yerlərdə bitirəcəyik. Önəmli olan ölkə kubokunda və çempionatda yaxşı nəticə qazanmaqdır. Mən və komandam buna inanırıq. Bu gün qələbə qazanaraq komandamızı yuxarılara çıxarmağı bacaracağıq”.

Qeyd edək ki, NTD – “Sərhədçi” matçı bu gün, saat 16:00-da "Sərhədçi" İdman Mərkəzində start götürəcək.