Azərbaycan Basketbol Liqasının XV turunun "Sumqayıt" – "Gəncə" oyunundan (80:91) sonra hər iki komandanın baş məşqçisi fikirlərini bildirib.

Prosport.Az həmin fikirləri təqdim edir:

Halil Atlı ("Gəncə"): “Bu oyundakı qələbəni komandamızın həkiminə həsr edirik. Onun səhhətində problemlər vardı, uğurlu cərrahiyyə əməliyyatı keçirdi. Hazırda özünü yaxşı hiss edir. Bir müddətdir ki, bizimlə birgə deyil. İnşallah, ən qısa zamanda bir yerdə olacağıq. Rəqibi mübarizəsinə görə təbrik edirəm. Kapitan olmadan oynadıq, qələbəyə görə uşaqlara minnətdaram. Rotasiyadan tam yararlanmağa çalışdıq. Yaxşı oynadıq, bununla belə, çatışmazlıqlar var. Bunları aradan qaldırıb sıx qrafiklə oynamağa başlayacağıq".

Vadim Kuramşın ("Sumqayıt"): "Gəncə"ni qələbə münasibətilə təbrik edirəm. Yaxşı komplektləşmiş komandadır. Hərçənd biz də pis oynamadıq. Amma yenə də millilərin oyununa görə çempionatda yaranan fasilə bizə düşmədi. Bu müddət ərzində 2 oyunçumuz möhkəm xəstələndi, 1-i millinin düşərgəsində idi, 1-i də zədəli idi. Həmişə olduğu kimi, yenə də 4 legionerlə oynadıq və bu da bizə çətindir. Tərslikdən 4-cü periodun əvvəlində Zayon Yanq da cəzalı vəziyyətə düşdü. Bunun nəticəsində görüşü 3 legioner və 2 yerli ilə bitirdik. İstənilən halda, layiqli mübarizə apardıq. Hakimlik haqda onu deyim ki, bu gün müəyyən mənada diqqətsizlik etdilər. Səhvləri sırf diqqətsizlikdən oldu. Bu da müəyyən mənada nəticəyə təsir göstərdi. Yəni, sona qədər arada fərq belə də qaldı".