"Araz Musayev 32il mənim yanımda tələbəm olub. İdmançı vaxtı qazandığı bütün uğurları mənim adımla bağlıdır. 2022-ci ildə fikirləşdim ki, yerimi ona verim, dəstək olum, federasiya irəli gedər. Ancaq təəssüf ki, əksi oldu".
Bunu Prosport.Az-a Azərbaycan Muay-Tay və Tayboks Federasiyasının prezidenti postuna iddia edən Azər Həsənsoy deyib.
O, dünən həmin federasiyanın prezidenti postuna iddia edən digər şəxs – Araz Musayevin iclas keçirməsinin heç bir əsası olmadığını bildirib. Onun sözlərinə görə, ötən ilin noyabrında həmin şəxs federasiyadan uzaqlaşdırılıb:
"Seçildiyi gündən federasiyaya öz təmir briqadası kimi yanaşmağa başlamış, heç bir iş görmədiyi halda ona yaltaqlıq etməyənləri, gözünə xoş görünməyənləri, onunla şəkil çəkdirməkdən yayınanları federasiyadan qovmaqla hədələmiş, məşqçiləri təhqir etmişdir. Bu hal federasiyanın üzv məşqçiləri arasında ciddi narazılıq və etirazlara səbəb olub. Ötən ilin avqust ayında İstanbulda keçirilən Türk Dünyası Muay-tay çempionatı zamanı bütün komandaların qarşısında baş məşqçimizə əl qaldırmış və ciddi əlbəyaxa yaranmasına səbəb olmuşdur. Bu utancverici hal bizi, ölkəmizi digər komandalar qarşısında biabırçı duruma düşürmüşdür.
O, şəxsi məsələləri federasiyanın mənafeyindən üstün tutdu. Nəticədə federasiyanın üzvlərinin 90%-i dedi ki, bu adam prezident postundan çıxmalıdır. Qaydalara uyğun olaraq, noyabrın 2-də növbədənkənar konfrans keçirərək onu səsvermə ilə rəhbərlikdən uzaqlaşdırdıq. Hazırda onun federasiya adından danışmaq üçün heç bir səlahiyyəti yoxdur".
Onun sözlərinə görə, Azərbaycan Kikboksinq Federasiyası akkreditasiyadan keçdiyindən, Gənclər və İdman Nazirliyi yalnız onların fəaliyyətini tanıyır. Bu səbəbdən də Muay-Tay və Tayboks Federasiyası məktublaşmaları Kikboksinq Federasiyası vasitəsilə edir:
"Əsassız və qanunsuz özünə federasiyanın yeni möhürünü düzəltdirən Araz Musayev heç bir hüquqi əsası olmadan federasiya adından danışır, hansısa sənədlər verməkdə davam edir. 9 fevral tarixində isə qanunsuz ödənişli döyüşlər keçirməyə cəhd etmiş və bu qanunsuzluğun qarşısı hüquq-mühafizə orqanları tərəfindən alınmışdır".
Azər Həsənsoy bildirib ki, hazırda Araz Musayev onun barəsində məhkəməyə müraciət etdiyindən, federasiyanın sonuncu seçkisinin nəticəsi hələ ki tanınmır. Məhkəmənin nəticəsindən asılı olaraq, tanınma olacaq: "Noyabrın 2-dəki konfransın nəticəsini Ədliyyə Nazirliyinə göndərmişik. Onlar da baxıb ki, bizim seçkimiz qanunauyğun keçirilib. Bu adam da prosesi saxlamaq üçün məni məhkəməyə verib. Məhkəmə məsələsi olarkən isə iddiaçı və cavabdeh tərəfin fəaliyyəti müvəqqəti dayandırılır".
Qeyd edək ki, Azər Həsənsoy həm də Azərbaycan Uşu Federasiyasının prezidentidir. Lakin bu qurum da nazirlik tərəfindən tanınmadığından, akkreditasiyadan keçmiş Çin Döyüş Növləri Assosiasiyasının nəzdində fəaliyyət göstərir.