Azərbaycan Muay-Tay və Tayboks Fedarasiyasının prezidenti Araz Musayev Azərbaycan Uşu Sanda Federasiyasının prezidenti Azər Həsənsoyu məhkəməyə verib.

Prosport.Az-ın xəbərinə görə, bu gün Muay-Tay və Tayboks Fedarasiyasının iclası keçirilib.

Araz Musayev federasiyanın İctiami Birlik kimi Ədliyyə Nazirliyinin reyestrindən olan çıxarışını iclas iştirakçılarına təqdim edib. O, Muay-Tay və Tayboks Fedarasiyasının daxili məsələlərinə müdaxilə etdiyinə görə Uşu Sanda Fedarasiyasının prezidenti Azər Həsənsoyu məhkəməyə verdiyini və muraciətin qəbul olunduğunu bildirib. Həmçinin, bildirilib ki, Kikboksinq Fedarasiyasının rəhbərliyi tərəfindən onların işinə müdaxilə edilib, şəhidlərin xatirəsinə həsr olunmuş yarışa mane törədilib.

İclasda həmçinin klublara əsasnamələr təqdim olunub. Ümumilikdə 12 klub yaradılıb, həmçinin yığma komandaya yeni baş məşqçi və məşqçilər təyin olunub. Beynəlxalq Muay-Tay Fedarasiyaları Assosiasiyasının bu quruma göndərdiyi məktuba əsasən, illik təqvim planında olan yarışların vaxtı açıqlanıb.

Bu il bu idman növündə vacib yarışlar bunlardır: 22-31 mayda böyüklərin dünya çempionatı (Kappadokya, Türkiyə), Sentyabrda gənclərin dünya çempionatı (Əbu-Dabi, BƏƏ), 7-21 noyabrda Islam Həmrəyliyi Oyunları (Ər-Riyad, Səudiyyə Ərəbistanı), 20-27 noyabrda Avropa çempionatı (Afina, Yunanıstan).

Qeyd edək ki, Araz Musayevlə Azər Həsənsoy vaxtı ilə bir yerdə çalışıb. 2022-ci ilin martın 14-də sözügedən federasiyanın prezidenti olan Azər Həsənsoy istefa verərək yerini vitse-prezident olan Araz Musayevə verib.

Onu da bildirək ki, Muay-Tay və Tayboks Fedarasiyası Gənclər və İdman Nazirliyindən akkreditasiyadan keçə bilməyən qurumlardan biridir. Bu səbəbdən federasiya hazırda Adil Əliyevin fəxri prezidenti və Orxan Əliyevin prezidenti olduğu Azərbaycan Kikboksinq Federasiyasının daxilində fəaliyyət göstərir. Yarışların keçirilməsi razılığı Kikboksinq Federasiyasının rəhbərliyinin razılığı alınmaqla baş tutur.